Stefnu í peningamálum ?

Hefur Samfylkingin einhverja stefnu í peningamálum ?   Eða ráðherra sem hafa vit á peningamálum ?

Ríkisstjórnin verður að svara kalli um breytingar

Viðskiptaráðherra dregur lappirnar í þessu máli

Það er nú þegar búið að koma fram að það er ekki síst viðskiptaráðherra Björgvin G. Sigurðsson sem er að draga lappirnar í þessu máli.  Í fyrsta lagi er sá maður gjörsamlega óhæfur í þessu starfi.  Um það eru ekki ómerkari menn en Óli Björn Kárason mér sammála.  Í öðru lagi þá ýmist gerir þessi ráðherra ekki neitt, veit ekki neitt eða gerir hluti alltof seint.   Fram kom hjá breska lögfræðingnum sem er að vinna í málinu fyrir okkur Íslendinga að það skortir upplýsingar frá okkur og þar á meðal var viðskiptaráðuneytið nefnt til sögunnar.

Það er nokkuð ljóst að ríkisstjórnin ætlar að humma þetta mál fram af sér nógu lengi til þess að við föllum á tíma og getum ekki farið í mál við Breta.  Eflaust er það vegna þess að við höfum eitthvað óþægilegt að fela.  Ríkisstjórnin veit að hún gerði mörg slæm mistök og menn þar á bæ vilja ekki að sannleikurinn komi í ljós.  

Hrokinn í Ingibjörgu

Það er með ólíkindum hvað Ingibjörg Sólrún getur verið hrokafull í svörum og hversu lítils virði kjósendur eru í hennar augum.   Fræg eru orðin hennar í Háskólabíó á fundinum um daginn þegar hún lét út úr sér "þið eruð ekki þjóðin".   Áttaði hún sig ekki á því þá að þarna var húsfyllir og ríflega það auk þess sem nánast hvert einasta mannsbarn sat við sjónvarpsskjáina heima og horfði á og hlustaði á svör ráðamanna ?

Nú segir hún með hroka að hátekjuskattur sé bara táknrænn og að gagnrýni forystumanna verkalýðshreyfingarinnar sé ómakleg þar sem þeir gagnrýna að ráðist sé á almannatryggingakerfið.  Í Kastljósi í gærkvöldi upplýsti Steingrímur J. að um væri að ræða u.þ.b. 4. milljarða skerðingu á þann hóp sem fellur undir það kerfi og ég verð að segja eins og er að mér finnst það vera "blóðugt" eins og Steingrímur J. orðaði það sjálfur.   Ég sé ekki að það hefði breytt öllu hvort fjárlögin eru afgreidd með 170 eða 174 millj. halla.

En svo þegar kemur að orðinu hátekjuskattur þá er hann "bara táknrænn" eins og Ingibjörg orðar það.   Jú vissulega má segja það, en var það ekki nákvæmlega það sem þurfti fyrir þjóðina að ríkisstjórnin myndi einmitt setja á skatt sem væri fyrst og fremst táknrænn þó svo hann myndi ekki skilja mörgum milljörðum í ríkiskassann.

Ég var persónulega á móti þeim hátekjuskatti sem lagður var niður hér fyrir fáeinum árum.  Hann var ekki "hátekjuskattur" heldur var hann viðbótarskattur á allt dugmikið vinnandi fólk í landinu sem lagði eitthvað aukalega á sig til að fá meiri tekjur.  Viðmiðunarmörkin þar voru fáránlega neðarlega.

Hátekjuskattur nú - sem vel að merkja ætti ekki að þurfa að taka þingið nema 120 mínútur að samþykkja, sbr. hækkun á bifreiðagjöldum og áfengisgjaldi í gær - ætti að leggjast á allt það sem flokka má sem ofurlaun.

Hver eru ofurlaun ?

Nýlegt dæmi um laun nýju bankastjóranna í ríkisbönkunum fór nærri að vera við þau mörk - alla vega sýndist mér þá að hið opinbera viðmið væri að 1.750 þús. á mánuði væri í lagi en 1.950 þús. ekki.  Laun Páls hjá RÚV eru því svona við "efri mörkin"

Samkvæmt almennum könnunum og minni tilfinningu eru mörk virkilegra hátekna þó neðar eða í kringum 1 milljón til 1.200 þúsund. á mánuði.   Og það eru launin umfram þessa fjárhæð sem skattleggja á að mínu mati með hátekjuskatti.

Illt er að hafa ekki náð í tekjur frá árinu 2007 varðandi þennan skatt en þrátt fyrir að ofurlaunamenn hafi orðið fyrir verulegri kjaraskerðingum upp á síðkastið þá voru launin fyrstu 9 mánuði ársins það ofboðslega há að skattur af þeim ætti að skila einhverju í ríkiskassann og alla vega væru fréttir, í kringum 1. ágúst 2009 um að einhver X fjöldi fólks hefði lendi í þessum skatti, jákvæðar fréttir fyrir fólkið í landinu.

Ég skora á þingmenn á Alþingi og fjárlaganefnd að samþykkja ekki Fjárlög næsta árs án þess að bæta við hátekjuskatti á ofurlaun.  Þó ekki væri nema til að sýna kjósendum örlitla virðingu.

Ingibjörg Sólrún hefur hins vegar sýnt það að hún veldur því ekki að vera í ríkisstjórn og það er verkefni kjósenda í næstu kosningum að gera henni það ljóst.

Hátekjuskattur bara táknrænn

Skelfileg lækkun - eða þannig :)

Aumingja framkvæmdastjóri LSR - nú verða launin hans aðeins kr. 1.485.000 á mánuði í stað 1.650.000 þetta er náttúrulega skelfilegt.  Hvernig fer hann að því að lifa á þessum launum eftir lækkunina ?  Ég bara spyr.

Launin lækkuð hjá LSR

Loðin svör að vanda

Þar kom að því sem allir vissu.  Vandanum er velt beint á hinn almenna launþega í landinu.   Og auðvitað geta ráðamenn ekki talað hreint út.    Hver verður hækkunin á útsvarinu ?   Ég er hræddur um að sú hækkun verði veruleg þar sem til stendur að fella niður aukaframlög í jöfnunarsjóð sveitarfélaga.   Við hinn almenni borgari verðum að taka á okkur með beinum hætti vandræðagang og úrræðaleysi ráðamanna.   Í tillögum ríkisstjórnar er ekki að finna eitt einast orð um sérstaka skattlagningu á ofurlaun.   Enda má ekki skerða eitt einasta hár á höfði útrásarvíkinganna og annarra sem nutu góðs af svokölluðu góðæri undanfarið og tilfærslu á peningum sem ekki voru til og enginn hafði unnið fyrir.

Tekjuskattur og útsvar hækka

Ekki háðir eftirliti Fjármálaeftirlitsins

Ég vek athygli lesenda á því að í fréttinni um lífeyrissjóðina kemur fram að þeir séreignasjóðir sem heyrðu undir bankana voru ekki háðir eftirliti Fjármálaeftirlitsins og því í sumum tilfellum fjárfest óvarlega.   Ætli það sé ekki frekar varlega orðað í fréttinni að þetta hafi bara gerst í sumum tilfellum.

 

Mega taka séreignasparnaðinn út í einu lagi

Nei sko - Björgvin loksins vaknaður

Góðan daginn Björgvin G. Sigurðsson og velkominn á fætur.  Ég er sammála öðrum bloggurum að tími væri kominn til að þú gerðir eitthvað.   Síðasta sem ég man eftir að frá þér hafi komið er gæluverkefnið um seðilgjöldin sem vel að merkja var í gangi síðustu dagana fyrir bankahrunið.  Nú er bara að halda sér vakandi og fylgjast með því sem er í gangi og fellur undir ráðuneyti viðskipta og bankamála.

Stjórnvöld í Lúxemborg veiti upplýsingar

Björgvin - segðu af þér nú þegar

Björgvin viðskiptaráðherra er búinn að hafa í það minnsta 2 gullin tækifæri til þess að segja af sér sem ráðherra og gera það þannig að hann geti komið standandi í fæturna út úr því.  Þessum tækifærum sem og öðrum sem hann hefur haft hefur hann glatað.

Ég hef sagt lengi og sagði t.d. strax að morgni þegar ljóst var að ríkið ætlaði að yfirtaka Glitni sem voru mikil mistök og illa undirbúin og vanhugsuð aðgerð, að Björgvin ætti að segja af sér strax.

Hann - ráðherra bankamála - vissi seinna en ég og flestir aðrir landsmenn um hvað fram hafði farið í Seðlabankanum nóttina á undan mánudeginum örlagaríka.  Auðvitað átti hann að segja þá þegar af sér.

Í dag fékk hann aftur tækifæri þegar Davíð kom fyrir þingnefnd og enn á ný (sem hafði svo sem komið fram áður) var ljóst að ráðherra bankamála hafði ekki hitt Davíð í heilt ár og þar að auki hafði formaður flokksins ekki upplýst ráðherra sinn í þessum málaflokki um hina alvarlegu stöðu sem landið stefndi í.  Það skiptir í þessu máli engu að Seðlabankinn heyri undir forsætisráðuneytið.  Það var verið að fjalla um alvarlega stöðu bankanna í landinu og þeir í það minnsta heyrðu undir ráðherra.  Eða er þetta kannski bara ráðuneyti "seðilgjalda" ?  (Minni á frétt frá 10.september á visir.is http://www.visir.is/article/20080910/FRETTIR01/4315776 )

Björgvin.  Ég skora á þig.  Segðu af þér áður en þessi vika er liðin.   Þú ert meiri maður fyrir vikið.  En ef ekki, þá mannleysa hin mesta.

Hitti Davíð ekki í tæpt ár

Eftirlitsteymi innan bankans.....

Gaman væri að vita hverjir skipa hið svokallaða eftirlitsteymi innan Glitnis banka sem fylgist með því að skilanefndin stígi ekki feilspor.  Hverjir skipuðu þetta eftirlitsteymi ?  Hver ef yfirmaður þess hóps ?

Svipað fyrirkomulag er án efa í Landsbanka og Kaupþing.

Þó það sé gott að vita að skilanefndirnar séu undir eftirliti, þá væri gott að vita hver annast slíkt og ber ábyrgð á því eftirlit.   Hver er í raun "hæstráðandi" í hverjum banka.

Uppgjörið tekur nokkur ár

Á hverjum bitnar þessi stýrivaxtahækkun ?

Nú á endanlega að gera út af við okkur einstaklinga í þessu landi sem ekki náðum að verða rík á tímum útrásar og "velmegunar".   Við sem ekki bjuggum til peninga úr engu heldur þurftum að fá venjuleg bankalán og yfirdrætti til að draga fram venjulegt líf í þessu landi, lendum æ ofan í æ í því að vextir eru hækkaðir óþyrmilega á okkar skuldir, þannig að upphaflegar greiðsluáætlanir riðlast gjörsamlega og við sökkvum dýpra í fenið.  Þetta er ekki fólkið sem er að færa fjármuni úr landi. Og svona lítur dæmið út á venjulegum íslenskum heimilum.

Í byrjun mánaðar kölluðu atvinnulífið, samtök launafólks og fleiri eftir verulegri vaxtalækkun sem væri það eina sem virkilega gæti komið hjólum atvinnulífsins í gang.   Svo kom smánarlega lítil lækkun loksins eða 3,5% í stað 7-8% lækkunar sem talin var eðlileg.   Þetta var samt jákvætt skref í rétta átt.   Hvað gerist svo í dag.  Allt í einu tekur Seðlabankinn sig til og ákveður á ný 6% vaxtahækkun og nú er allt í lagi að hækka strax en ekki bíða til 6.nóvember eins og áður hafði verið tilkynnt.

Þessi hækkun þýðir bara rothögg fyrir atvinnulífið í landinu.

Stýrivextir hækkaðir um 6 prósentur